Kommunelege Jan Helge Dale i Flora seier til NRK Sogn og Fjordane at han fryktar Helse Førde skriv ut pasientar for tidleg for å skaffe seg inntekter. Dale blir oppskriftsmessig imøtegått av samhandlingssjefen i helseføretaket, Vidar Roseth, som sjølvsagt avviser at dei prøver å lure kommunane. Vi har ikkje grunnlag for å meine noko om innhaldet i påstandane frå Dale, men kommunelegen set likevel søkjelys på ei side ved samhandlingsreforma som kan skape mange konfliktar i åra framover, nemleg at pasientane blir brikker i puslespelet når budsjetta skal syast saman. For helseføretaka er det god butikk i å få ned liggjetida, og dermed velte det økonomiske ansvaret over på kommunane, som har ansvar for utskrivingsklare pasientar. Då er det også soleklart at det ein kan risikere at pasientar kan bli skrivne ut før dei er klare. Den risikoen ligg nemleg innbakt i systemet som no er innført.

Dermed er behandlingstida blitt ein openlys og lett målbar økonomisk faktor, som rasjonaliseringsekspertane heilt sikkert vil ha fokus på. Og når spesialisthelsetenesta har så openberre økonomiske fordelar av ei så kort liggjetid som mogleg, anten ved at sjukehusa slepp utgifter eller ved at dei kan sende rekninga vidare til heimkommunen når ein pasient blir liggjande over tida, kan ein ikkje utan vidare avfeie faren for at det i ein del tilfelle kan komme til å gå ut over pasienttryggleiken.

Om Dale har grunnlag for å tru at sjukehusa med vitande og vilje skriv ut pasientar for tidleg for å sikre seg inntekter, har vi på ingen måte føresetnad for å meine noko om. Men motivet frå sjukehusa si side for å gjere det, er utvilsamt til stades. Det er derfor naudsynt at både sjukehusa sjølve, kommunelegane og helsetilsynet har gode kontrollrutinar og evaluerer dei utskrivingspraksisane som dei ulike sjukehusa opererer med, etter

Det fall i si tid Venstre-leiinga tungt for brystet at Unge Venstre gjekk inn for legalisering av hasj og marihuana. Dåverande partileiar Lars Sponheim la ballen frå ungdomspartiet kontant daud, og sentralleiinga i Venstre gjorde sitt beste for å tone ned vedtaket, som er i strid med den tverrpolitiske motstanden som det har vore i Norge mot legalisering av desse stoffa.

No er katta igjen sleppt ut av Venstresekken: Først gjekk Unge Venstre-leiar Sveinung
Rotevatn ut og kritiserte politi og behandlingsapparat for ei forelda haldning til hasjbruken. For partiet er det ei pinleg sak, men så lenge det berre galdt Unge Venstre, kunne ein leve med det. Verre blir det når også fylkesleiar Marit Barsnes Krogsæter går inn for å avkriminalisere hasj og marihuana. Det skakar sjølve grunnfjellet i medlemsmassen, der mange venstrefolk vil ha problem med å kjenne seg att om slike haldningar skulle bli offisiell Venstre-politikk.

Vi er også forundra over måten Krogsæter, som fylkespartileiar, lanserer slike kontroversielle tankar på. Ho står for ei klar kursendring frå ei linje som det hittil har vore brei politisk semje om i norsk politikk, og frå andre parti er reaksjonane sterke. Ikkje minst i KrF, som tradisjonelt er på linje med Venstre i mange verdispørsmål, blir utspelet frå Krogsæter sett på som uttrykk for ei skremmande haldning. KrF-fylkesleiar Trude Brosvik peikar også på inkonsekvensen i å tru at ei legalisering og dermed lettare tilgang til slike stoff, vil redusere bruken, slik Krogsæter prøver å innbille seg. At cannabis i enkelte tilfelle blir brukt som legemiddel, har heller ingen ting med saka å gjere.
Venstre er eit parti som opp gjennom si lange historie ofte har vore i konflikt med seg sjølv. Gjennom sine kontroversielle uttaler om legalisering av hasj, følgjer dermed fylkespartileiaren i det minste opp ein etablert tradisjon i partiet.